Aptis ESOL Results, image

Aptis ESOL natijalaringiz haqidagi barcha zarur maʼlumotlarni bu yerdan topishingiz mumkin.

Aptis ESOL imtihoningiz natijalari uch xil usulda taqdim etiladi:

  • Raqamli ball: har bir tarkibiy qism uchun 0 dan 50 gacha boʼlgan ball
  • Har bir til koʻnikmasi uchun Umumyevropa til koʻnikmasi standartlari (CEFR) boʻyicha koʻrsatkich
  • Umumyevropa til koʻnikmasi standartlari (CEFR) bo‘yicha umumiy daraja.

Aptis ESOL sertifikatining bosma va raqamli shakllari teng darajada haqiqiy boʻlib, barcha test topshiruvchilar uchun taqdim etiladi.

Agar sertifikatingizni qabul qiluvchi tashkilotga taqdim etishingiz zarur boʻlsa, ular email orqali yuborilgan nusxani qabul qilishlari yoki qogʻoz nusxasini talab qilishlarini aniqlash uchun ular bilan bogʻlanishingizni soʻraymiz.

Agar sertifikatingizning qogʻoz nusxasini taqdim etishingiz kerak boʻlsa, uni chop etishda quyidagilarga eʼtibor bering:

  • faqat A4 formatdagi qogʻoz oʻlchamini tanlang
  • ikki tomonlama va rangli chop etish sozlamalarini tanlang
  • faqat A4 120 gsm oq qogʻozdan foydalaning

Har bir nomzod sertifikatiga ijtimoiy tarmoq profillarida ulashish mumkin boʻlgan CEFR darajasini koʻrsatuvchi raqamli nishon ilova qilinadi. Ushbu xususiyat nomzodlarga oʻz yutuqlarini namoyish etish orqali ish topish imkoniyatlarini oshirish va portfoliolarini boshqalardan ajratib koʻrsatish imkonini beradi.

Aptis ESOL natijalari hisoboti namunasiga razm solish (PDF).

Sizning Aptis ESOL testi natijalaringiz test oʻtkazilgan kundan soʻng 48 soatdan 72 soatgacha boʻlgan muddat ichida (dam olish va bayram kunlari bundan mustasno) eʼlon qilinadi va email orqali sizga yuboriladi.

Aptis ESOL ballari ingliz tilini tushunish va unda muloqot qilish qobiliyatingizni koʻrsatadi.

Aptis ESOL General Umumyevropa til koʻnikmasi standartlari (CEFR) asosida A1 darajasidan B2 darajasigacha boʻlgan til koʻnikmalarini baholaydi. Agar siz B2 dan yuqori darajani koʻrsatsangiz, sizga C1 beriladi.

Aptis ESOL Advanced Umumyevropa til koʻnikmasi standartlari (CEFR) asosida til bilish darajasini B1 dan C2 gacha baholaydi.

Barcha Aptis ESOL sertifikatlari test natijalarining haqiqiyligini tasdiqlovchi raqamli natijani tekshirishni taʼminlaydigan unikal QR-kod va havolani oʻz ichiga oladi. Ushbu xususiyat eng yuqori darajadagi xavfsizlikka ega blokcheyn hisob maʼlumotlaridan foydalanib, Britaniya Kengashi tomonidan berilgan barcha test natijalarini tasdiqlaydi.

Aptis ESOL natijalari  va ballar hisobotini qanday oʻqish haqida batafsil.

Agar natijalaringiz sizni qoniqtirmasa, imtihonni qayta tekshirishni soʻrashingiz mumkin. Natijalar boʻyicha soʻrov deb ataladigan bu xizmatdan imtihon oʻtkazilgan kundan boshlab sakkiz hafta davomida foydalanish mumkin.

Hozirda ushbu xizmat uchun toʻlov 648 000 soʻmni (40 funt sterling) tashkil etadi.

Natijalar boʻyicha soʻrovyuborish uchun, info@britishcouncil.uz email manziliga xabar yoʻllashingiz va toʻlov amalga oshirilganligini tasdiqlovchi hujjatni ilova qilishingiz lozim.

Shuni eʼtiborga olingki, Aptis ESOL shartlari va qoidalariga muvofiq, Britaniya Kengashi nomzodlarga, test markazlariga yoki muassasalarga Aptis ESOL testining javoblarini baholash jarayonida, undan keyin yoki natijalar boʻyicha soʻrovning bir qismi sifatida koʻrish yoki tekshirishga ruxsat bermaydi.

Bu boshqa imtihon oʻtkazuvchi tashkilotlarning standart amaliyotlariga muvofiq boʻlib, Britaniya kengashi ham shaxsiy maʼlumotlarga kirish soʻroviga javoban imtihon javoblarini taqdim etmaydi.

Siz faqat alohida qismlarinigina emas, balki butun testni qayta baholashni soʻrashingiz mumkin.

  • Grammatika va soʻz boyligi, Reading hamda Listening qismlari baholashdagi aniqlikni taʼminlash maqsadida tizim tomonidan tekshiriladi.
  • Speaking va Writing boʻlimlari malakali mutaxassislar tomonidan qayta tekshiriladi.

Agar qayta baholashdan soʻng sizning umumiy CEFR darajangiz koʻtarilsa, natijalarni tekshirish uchun toʻlagan toʻliq summa sizga qaytariladi va yangi Aptis ESOL sertifikati beriladi.

Agar sizning CEFR darajangiz oʻzgarmasdan qolsa yoki umumiy darajaga taʼsir koʻrsatmagan holda faqat bitta komponentda oʻzgarish boʻlsa, toʻlov saqlanib qoladi va bu haqda sizga xabar yuboriladi.

Natijalar boʻyicha tekshiruv xulosasi yakuniy hisoblanadi. Qayta baholash jarayoni natijalari oʻn ish kunidan soʻng maʼlum boʻladi

Sizning Aptis ESOL sertifikatingiz test topshirgan kuningizdan boshlab 10 ish kuni ichida chop etilib, tayyor boʻladi. Sertifikatlar pochta xizmati orqali joʻnatiladi.

Sinov oʻtkazilgan sanadan boshlab pochta xizmati orqali yetkazib berish 14 ish kunigacha vaqt olishi mumkin.

Agar siz Aptis ESOL hamkor markazi yoki boshqa muassasa orqali roʻyxatdan oʻtgan boʻlsangiz, sertifikatingiz bevosita ularga joʻnatiladi. Keyin ular sizga sertifikatni berishga masʼul boʻladi.

Shuni eʼtiborga olingki, Britaniya Kengashi Oʻzbekistondagi birorta ham markazida sertifikatlarni shaxsan qoʻlga olish xizmatini koʻrsatmaydi.

Agar siz 2025-yil 24-aprelgacha Aptis ESOL imtihonini topshirgan boʻlsangiz, sizga berilgan sertifikat siz test topshirgan mamlakatda erishgan CEFR darajangizni tasdiqlab beradi. Biroq, unda Ofqual nazoratchi organ boʻlgan Angliyada amal qiladigan malaka darajasi koʻrsatilmagan. Britaniya kengashi buni soʻragan oʻquvchilarga sertifikatning toʻgʻrilangan nusxasini taqdim etadi. Agar siz bepul almashtirish sertifikatini olishni xohlasangiz, Britaniya Kengashiga murojaat eting.
Share this